Nvidia CEO-dan Nintendo Switch 2 üçün yüksək qiymətləndirmə

Gözlənilən Nintendo Switch 2 oyun konsolunun texniki detalları artıq üzə çıxmağa başlayıb. Nvidia-nın baş direktoru Jensen Huang, yeni nəsil Switchin “əvvəl heç dizayn etmədikləri ən xüsusi çip” olduğunu və cihazın mobil texnologiya dünyasında böyük bir irəliləyiş təklif etdiyini bildirib. Huang, bu çipin üç əsas yeniliyi bir araya gətirdiyini vurğulayıb.

Birincisi, cihazın tam aparat ray-treysinq və HDR dəstəyi ilə təchiz olunmasıdır. Bu xüsusiyyət portativ oyun konsollarında əvvəl heç görülməmiş görüntü keyfiyyətinə imkan verir.

İkincisi isə süni intellekt tərəfindən dəstəklənən xüsusi nüvələrlə bağlıdır. Bu nüvələr oyun zamanı görüntüləri kəskinləşdirmək, animasiyaları yaxşılaşdırmaq və ümumi vizual keyfiyyəti real vaxtda artırmaq kimi funksiyaları yerinə yetirir. Bu isə oyunlarda daha hamar bir vizual təcrübə təmin edir və tərtibatçılar üçün yeni aparat əsaslı optimallaşdırma imkanları yaradır.

Üçüncüsü isə bütün bu inkişaf etmiş performansın çox aşağı enerji istehlakı ilə təklif olunmasıdır. Nvidia-nın yeni nəsil Tegra platforması portativ cihazlarda yüksək səviyyəli performans və enerji səmərəliliyi arasında ideal tarazlığı qurmağı hədəfləyir.

Əvvəlki sızmalarda Switch 2-nin prosessorunun "Tegra T239" kod adlı çip olduğu bildirilmişdi. Bu çipin performans səviyyəsinin nəzəri olaraq GTX 1050 Ti səviyyəsinə çatdığı qeyd olunmuşdu. Lakin son açıqlama ilə birlikdə cihazın yalnız xam güc deyil, həm də ray-treysinq, DLSS və süni intellekt baxımından güclü performans təklif edəcəyi aydınlaşdı.