Uber Rekord Qiymətə Trendyol Go-nu Aldı!

ABŞ-ın nəhəng texnologiya və nəqliyyat şirkəti Uber, Türkiyənin aparıcı onlayn çatdırılma platformalarından biri olan Trendyol Go-nun səhmlərinin %85-ni 700 milyon dollarlıq rekord qiymətə əldə etdi. Əməliyyat müvafiq qurumların təsdiqlərindən sonra rəsmən başa çatacaq.

Trendyol Qrupunun açıqlamasında Trendyol Go-nun Uber Technologies-ə inteqrasiyası üçün razılaşmaya gəlindiyi bildirilib. Sazişə əsasən, Uber Türkiyə bazarında çatdırılma əməliyyatlarını Trendyol Go vasitəsilə davam etdirəcək. Platforma istifadəçilərə, satıcılara və kuryerlərə mövcud formada xidmət göstərməyə davam edəcək.

Alqı-satqı başa çatdıqdan sonra, Uber-in qlobal yemək və ərzaq çatdırılma şəbəkəsi olan Uber Eats-in əsas xüsusiyyətləri Trendyol Go-ya inteqrasiya olunacaq. Bu yolla Uber həm Türkiyə bazarında yerli istifadəçi təcrübəsini qorumağı, həm də öz qlobal çatdırılma infrastrukturunu genişləndirməyi hədəfləyir.

Trendyol Qrupunun prezidenti Çağlayan Çetin açıqlamasında bildirib ki, "Trendyol GO-nun yeni quruluşu ilə daha da böyüyəcəyinə və güclənəcəyinə tam əminik". Trendyol Go hazırda Türkiyə üzrə 19.000 kuryerlə xidmət göstərir və 90.000-dən çox restoran və mağazadan alış-veriş və yemək çatdırılmasını təmin edir.

Uber-in bu addımı ilə Türkiyədə çatdırılma bazarındakı rəqabətin daha da artacağı gözlənilir.