Snapdragon 8 Elite ilə işləyən ilk planşet yaxındır!

2025-ci ilin əvvəlində Redmi Note 14 və Poco X7 seriyasını, simsiz qulaqlıqları, ağıllı saatları və powerbankları dünyaya təqdim edən Xiaomi, indi də yeni bir planşet üzərində işləyir.

Gözlənilən Xiaomi planşeti Snapdragon 8 Elite prosessoru ilə təchiz olunacaq. Bu, Qualcomm-un ən güclü prosessorlarından biridir və indiyədək smartfonlarda istifadə olunurdu. Yeni hesabatlara görə, 2025-ci ildə satışa çıxarılacaq Xiaomi planşeti bu prosessorla işləyəcək və beləliklə, bu çipdən istifadə edən ilk planşet olacaq.

Planşetin adı hələ açıqlanmasa da, Xiaomi Pad 8 adlandırılacağı gözlənilir. 8 GB operativ yaddaş, yüksək qətnaməli ekran və 10000 mAh-dan çox batareya tutumu gözlənilir. Bu barədə daha aydın təsəvvür üçün, dörd ay əvvəl satışa çıxarılan Xiaomi Pad 7 Pro-nun xüsusiyyətlərinə nəzər salaq: 11.2 düym ekran, 2136 x 3200 piksel qətnamə, 800 nit parlaqlıq, 144Hz təzələmə tezliyi, Dolby Vision, HDR10, IPS LCD ekran, Snapdragon 8s Gen 3 prosessoru, 50 MP arxa kamera, 32 MP ön kamera, 8GB/12GB RAM, 128GB/256GB/512GB daxili yaddaş, 8850mAh batareya, 67W sürətli şarj və s.

Yeni Xiaomi planşeti, öz texnologiyaları ilə Azərbaycan bazarında özünə yer tapacaq güclü bir rəqib olacaq.