Rusiyanın oyun konsolları: PS5 və Xbox'un yanında kölgədə qaldı

Keçən ilin sonlarında Rusiyanın iki fərqli oyun konsolu üzərində işlədiyi barədə xəbərlər yayıldı. Texnologiya sahəsində inkişaf etmiş bir ölkə kimi tanınan Rusiya üçün oyun konsolu istehsalı olduqca çətin bir sahədir. Çünki bu, uzun illər təcrübə və xüsusi bilik tələb edir. İndi isə Rusiya etiraf edir ki, hazırladıqları iki konsol da güc baxımından rəqiblərinin yanında solğun görünür.

İki fərqli yanaşma: Fiziki və bulud əsaslı konsol. Rusiya PS5 və Xbox Series kimi nəhənglərlə rəqabət aparmağın mümkün olmadığını qəbul edir. Bu səbəbdən hazırladıqları konsollardan biri "Elbrus" prosessoru ilə işləyir. Əsasən kritik infrastruktur və müdafiə tətbiqləri üçün nəzərdə tutulan "Elbrus" prosessorları, oyun performansı baxımından lazımi gücü təmin edə bilmir. Rusiya rəsmiləri açıq şəkildə etiraf edib ki, bu konsol mövcud nəsil cihazlarla rəqabət apara bilməz.

İkinci cihaz isə tamamilə fərqli bir yanaşma təklif edir. Cəmi 45 dollara satılan bu cihaz, "Fog Play" adlı bulud əsaslı oyun platformasına əsaslanır. Yüksək performanslı kompüterləri olan istifadəçilər sistemlərini platformaya kirayəyə verərək, daha aşağı sistem tələblərinə malik istifadəçilərin oyun oynamasına imkan yaradır. Lakin bu cihaz da ciddi oyun həvəskarlarını cəlb etməkdə çətinlik çəkir.

Rusiya Prezidenti Vladimir Putinin mart ayında verdiyi göstərişdən sonra başlayan bu təşəbbüs yerli istehsal cihazlar və oyun ekosistemlərinin qurulmasını hədəfləyirdi. Lakin Anton Gorelkin kimi rəsmilər indi bu konsolların PS5 və ya Xbox Series səviyyəsinə çatmasının mümkün olmadığını etiraf edirlər. Gorelkin bildirib ki, bu konsolların əsas məqsədi yerli oyunların təbliği və populyarlaşdırılmasıdır. Sizcə, bu cihazlar gələcəkdə oyun dünyasında öz yerlərini tuta biləcəklərmi?