Huawei-dən Maybax'ı kölgədə qoyan lüks elektrikli avtomobil

Huawei, avtomobil sektorunda lüks seqmentə öz iddiasını nümayiş etdirməyə hazırlaşır. Şirkətin ağıllı nəqliyyat vasitələri bölməsinin dəstəklədiyi Maextro S800, 26 noyabrda rəsmi olaraq təqdim olunacaq. Bu addımla Huawei, Maybax və Rolls-Royce kimi tanınmış brendlərin üstünlük təşkil etdiyi lüks avtomobil bazarına girməyi hədəfləyir.

İnternetdə yayılan şəkillər S800-ün dizaynını ortaya qoyub. Xüsusilə, avtomobilin arxa fənərlərindəki çoxlu işıq mənbəyi ilə yaradılan effekt diqqət çəkib. Huawei-nin baş direktoru Richard Yu-nun cəsarətli bəyanatları da gözləntiləri artırır. Baş direktor Yu bildirib ki, yeni avtomobil həm hörmətli, həm də gözqamaşdırıcı dizayna sahib olacaq.

Avtomobilin digər diqqətəlayiq dizayn elementləri arasında ulduz konsepsiyalı qapı tutacaqları, iki rəngli gövdə seçimi və 21 düymlük təkərlər yer alır. Avtomobilin ön işıq imzası da özünəməxsus xüsusiyyətə malikdir. S800-ü rəqiblərindən fərqləndirən ən mühüm xüsusiyyət isə tam elektrikli ötürücü sistemidir. JAC X6 platformasında qurulan S800-ün damında LiDAR sensoru var. Bu o deməkdir ki, avtomobil qabaqcıl sürücü yardım sistemlərini (ADAS) dəstəkləyəcək.

Avtomobilin infotainment sisteminə Huawei HarmonyOS əlavə olunacaq. Huawei-nin HIMA (Harmony Intelligent Mobility Alliance) ekosisteminin zirvəsində yer alan Maextro, yeni modelini 140.000 dollar qiymətə təqdim edə bilər. Xatırladaq ki, təqdimat 26 noyabrda keçiriləcək.