Dünyanın Ən Böyük Elektrikli Gəmisi Yolda!

Finlandiya gəmiçilik şirkəti Viking Lines, dünyanın ən böyük elektrikli gəmisi olacaq Heliosun ilk rəsmi məlumatlarını açıqlayıb. Hazırda inkişaf mərhələsində olan bu nəhəng gəmi tamamilə elektrik enerjisi ilə işləyəcək. Şirkət Heliosun ölçüləri, batareya tutumu və daşıma qabiliyyəti kimi əsas texniki detalları ictimaiyyətə təqdim edib.

Heliosun uzunluğunun təxminən 195 metr, eninin isə 30 metr olduğu bildirilib. Tamamilə elektrik ötürmə sistemi ilə 23 düyün, yəni təxminən saatda 42.5 kilometr sürətə çata biləcəyi qeyd olunub. Bu sistem 85 ilə 100 meqavat-saat (MVt) arasında tutuma malik nəhəng batareyalar vasitəsi ilə işləyəcək. Batareyaları doldurmaq üçün limanda 30 meqavat gücündə doldurma sistemi quraşdırılması planlaşdırılır.

Helios, Finlandiyadakı Helsinki Limanı ilə Estoniyanın Tallin şəhəri arasında müntəzəm olaraq fəaliyyət göstərəcək. Bu iki nöqtə arasındakı məsafə 43 dəniz mili, yəni təxminən 80 kilometrdir. Gəmi eyni zamanda 2000 sərnişin və 650 nəqliyyat vasitəsi daşıya bilər. Viking Line layihəni Finlandiyadakı Rauma gəmiqayırma zavodu və müxtəlif tərəfdaşlarla birgə həyata keçirir.

Layihə tamamlandıqdan sonra gəmi yalnız Baltik dənizi regionu üçün deyil, həm də dünya üçün elektrikli gəmiçiliyin texniki və ekoloji sərhədlərini yenidən müəyyən edən bir nümunə olacaq. Layihənin 2030-cu ilin əvvəllərində başa çatması planlaşdırılır. Dünya üzrə elektrikli gəmilərin yayılması ilə yanaşı, daha uzun məsafəli gəmiçilik üçün ammonyak və hidrogen kimi alternativ enerji mənbələri də yanacaq növü kimi qiymətləndirilir. Lakin Helios, tamamilə elektrik sistemi ilə ən böyük gəmi kimi bu sahədə miqyas problemindən birbaşa həll yolu təklif edəcək.