ASUS-dan 32 düymlük 4K OLED oyun monitoru!

ASUS, oyun həvəskarlarını heyran edəcək yeni nəsil oyun monitoru ROG Swift OLED PG32UCDMR-i təqdim edib. 32 düymlük, 4K çözünürlüklü QD-OLED paneli ilə gələn bu monitor, 240Hz təzələmə sürəti və 0.03 millisaniyə cavab müddəti sayəsində sürətli oyunlarda inanılmaz axıcılıq təmin edir.

Üçüncü nəsil QD-OLED panel texnologiyasından istifadə edən ASUS, görüntü kəskinliyi və mətn aydınlığında da əhəmiyyətli yaxşılaşmalar təqdim edir. Geniş DCI-P3 rəng qaması və aşağı Delta E dəyəri ilə rəng dəqiqliyi ən yüksək səviyyədədir. Parlaqlıq baxımından SDR rejimində 450 nit, HDR kontenti üçün isə 1000 nitə qədər çatır.

HDR10 və Dolby Vision dəstəyi ilə gələn cihaz, eyni zamanda VESA DisplayHDR True Black 400 sertifikatına malikdir. Bağlantı seçimləri arasında DisplayPort 2.1a ilə 80 Gbps bant genişliyi təmin edən port da mövcuddur. HDMI 2.1 girişi ilə yanaşı, 90 Vt güc ötürmə qabiliyyətinə malik USB-C bağlantısı da var. Qutuda verilən DP80 kabeli DisplayPort 2.1a standartını dəstəkləyir. Monitor, daxili KVM keçid sayəsində bir toxunuşla bir neçə cihaz arasında keçid imkanı təklif edir.

Ekran Nvidia G-Sync və AMD FreeSync Premium Pro texnologiyaları ilə uyğun gəlir. Beləliklə, kadr sinxronizasiyası problemləri qarşısı alınır və rəqabətçi oyunçulara daha sabit görüntü təqdim olunur. Dizayn tərəfindən incə çərçivə quruluşu, ergonomik ayaqaltı və RGB işıqlandırma detalları diqqəti cəlb edir. Məhsulun satış tarixi və qiymət məlumatı hələ açıqlanmayıb.