Putin-dən yeni təhdidlər: Dünya müharibəsi təhlükəsi?

Ukraynanın ABŞ və Böyük Britaniya istehsalı olan raketlərlə Rusiyanı vurması fonunda, Vladimir Putin sərt açıqlama ilə çıxış etdi. O bildirdi ki, aqressiv hərəkətlərin davam etməsi halında, Rusiya qətiyyətli və qarşılıqlı cavab verəcək.

Rusiyanın Ukraynaya ballistik raket hücumundan sonra Putin xalqa müraciət etdi. "Ukraynadakı qarşıdurma artıq qlobal xarakter alıb" dedi o. Putin, Qərbin Ukraynada qızışdırdığı münaqişənin ABŞ və NATO tərəfindən daha da alovlandırıldığını vurğuladı.

19 noyabrda 6 ATACMS və 21 noyabrda isə Storm Shadow raketləri ilə Kursk və Bryansk bölgələrinə hücumların hədəfə çatmadığını iddia edən Putin, uzun mənzilli raketlərin Rusiya ərazisində istifadəsinin həmin raketlərin istehsal olunduğu ölkələrin mütəxəssisləri olmadan mümkün olmadığını bildirdi. Bu, hamıya məlum həqiqətdir.

Putin, Ukraynanın Qərb istehsalı raketlərlə hücumuna cavab olaraq Rusiyanın "Oreşnik" adlı hipersonik raketlərlə cavab verdiyini və hədəfin uğurla vurulduğunu söylədi. "Oreşnik" raketinin istifadəsi, ABŞ-ın orta və qısamənzilli raketlər istehsal etmək və yerləşdirmə planlarına cavabdır, - dedi o.

"Müasir hava hücumundan müdafiə sistemləri "Oreşnik" raketlərini maneə törədə bilmir, onlar hədəfə saatda 7-8 min kilometr sürətlə çatırlar" – deyə Putin vurğuladı.

Putin, ABŞ-ın Ukraynanın ABŞ istehsalı silahlarından istifadə etməsinə icazə verməsini tənqid edərək, "ABŞ bütün dünyanı qlobal münaqişəyə sürükləyir" dedi və 2019-cu ildə orta və qısamənzilli raketlərin ləğv edilməsi haqqında sazişdən imtina etməklə ABŞ-ın səhv etdiyini bildirdi.

Rusiya ərazisinə raket hücumlarının davam etməsi halında eyni şəkildə cavab veriləcəyini bildirən Putin, "Aqressiv hərəkətlərin artması halında, biz də qətiyyətli və qarşılıqlı cavab verəcəyik" deyə hədələdi. O, həmçinin Ukraynadakı əməliyyatların davam edəcəyini və bütün hərbi tapşırıqların yerinə yetiriləcəyini qeyd etdi.

Qeyd edək ki, Rusiyanın Londondakı səfiri Andrey Kelin də Böyük Britaniyanın Rusiya-Ukrayna müharibəsinə birbaşa müdaxilə etdiyini bildirib.