Kurskda ATACMS Füzeləri ilə Yenidən Hücum: Rusiya Cavab Vədini Verdi

Rusiya Müdafiə Nazirliyi, Ukraynanın Kursk bölgəsinə Amerikan istehsalı olan uzun mənzilli ATACMS raketləri ilə təkrar hücumlar etdiyini və bunun cavabsız qalmayacağını açıqladı.

Nazirliyin açıqlamasında son 3 gündə Kursk bölgəsindəki hərbi obyektlərə Qərb istehsalı uzun mənzilli silahlar ilə hücumlar edildiyi bildirilir. 23 noyabrda 5 ədəd ATACMS raketinin S-400 sistemlərinin yerləşdiyi əraziyə atıldığı, 3-ünün Pantsir hava hücumundan müdafiə sistemi tərəfindən məhv edildiyi, 2-sinin isə hədəfə çatdığı deyilir. Hava hücumundan müdafiə sistemi ziyan görüb, hərbi qulluqçular yaralanıb.

25 noyabrda Kursk Vostoçnıy Hava Limanına edilən hücumda isə 8 ATACMS raketinin istifadə olunduğu, 7-sinin Pantsir sistemi ilə vurulduğu, 1-nin isə hədəfə çatdığı bildirilir. Raket qalıqlarının düşməsi nəticəsində 2 rus əsgəri yüngül yaralanıb, infrastrukturda ziyan dəyib. Rusiya Müdafiə Nazirliyi, vəziyyətin nəzarət altında olduğunu və cavab tədbirlərinin hazırlandığını bildirib.

Nazirlik, hər iki hücumda istifadə olunan ATACMS raketlərinin qalıqlarının fotolarını da yayımlayıb.

Xatırladaq ki, keçən həftə Rusiya Müdafiə Nazirliyi Ukraynanın Bryansk bölgəsinə ATACMS raketləri ilə hücum etdiyini bildirmişdi. Rusiya Prezidenti Vladimir Putin isə bunun cavabında Ukraynanın hərbi-sənaye kompleksinin bir obyektinə hücum edildiyini və Rusiyanın orta mənzilli raket sistemlərindən birinin nüvə olmayan hipersonik silahlarla təchiz olunmuş ballistik raketlə sınaqdan keçirildiyini açıqlamışdı. ABŞ hökuməti isə Ukraynanın Rusiya ərazisinə uzun mənzilli raketlərlə hücum etməsinə icazə verdiyi barədə xəbərləri təsdiqləmişdi.